Weir Minerals (Шотландия) Алматыда Қызмет көрсету орталығын іске қосты
Алматының индустриялық аймағы аумағында британдық «Weir Minerals» трансұлттық компаниясының сервистік орталығының ресми ашылуы өтті.
Жалпы ауданы 3300 м2 болатын «Weir Minerals» өндірістік орталығы суық әдіспен қаптау жұмыстарын орындауға, сондай-ақ вулканизация процесінде өндірістік автоклавты пешті қолдануға қажетті құрал-жабдықтармен толық жабдықталған. Орталықтың жұмысы сорғы жабдықтарын, гидроциклондарды, арматураларды құрастыру және қалпына келтіруден тұрады.
Weir Minerals компаниясының Алматыдағы сервистік мүмкіндіктері Қазақстан мен Орталық Азиядағы тау-кен кәсіпорындары сұранысқа ие орнатуды қадағалау, іске қосу, жедел қолдау, техникалық қызмет көрсету, ақауларды жою, жабдық жағдайын талдау сияқты қызметтердің толық кешенін қамтиды.
Сондай-ақ орталық аумағында сағыздау бөлімі мен қосалқы бөлшектерді сақтайтын «А» класты қоймасы бар. Кәсіпорында 114-ке жуық жұмыс орны ашылды.
Өндіріс орнының ресми іске қосылуы Алматы қаласының әкімі Ерболат Досаев, Алматы қаласының индустриялық аймағының директоры Әлішер Сатыбалдиев, KAZAKH INVEST Еуропа елдерімен ынтымақтастық бөлімінің басшысы Анара Мекебаева және Ұлыбританияның Қазақстандағы елшісі Кети Личтің қатысуымен өтті.
Weir Minerals компаниясын іске қосу салтанатында NATCA аймағының басқарушы директоры Карола Шульц (Солтүстік Африка, Түркия және Орталық Азия), ENACA аймағының басқарушы директоры Гэвин Дайер (Еуропа және NATCA) және Қазақстан өкілдігінің директоры Сергей Оспищев қатысты.
Карола Шульцтың айтуынша, бұл кезеңде құрастыру орталығының құны шамамен 1 миллион фунт стерлингті құраған. Компания жақын арада қосымша миллион фунт стерлинг инвестициялауды жоспарлап отыр. Weir Minerals басшылығы жобаны жүзеге асыруда Қазақстан Республикасы Сыртқы істер министрлігі мен KAZAKH INVEST-тің ерекше қолдауын атап өтті.
Анықтама: Weir Group - 1871 жылы ағайынды Джеймс пен Джордж Вайр негізін қалаған, штаб-пәтері Глазго қаласында (Шотландия) орналасқан шотландтық трансұлттық инженерлік компания.
Кәсіпорынның негізгі қызметі бірқатар салаларға арналған мамандандырылған құрал-жабдықтарды шығару болып табылады. Өндірілетін жабдықтың қатарында суспензия сорғылары, гидроциклондар, жоғары қысымды роликті престер және басқа да өнеркәсіптік жабдықтар бар.
Weir Group құрамына бүкіл әлем бойынша 100-ге жуық компания, соның ішінде Қазақстан, Еуропадағы 23 өнеркәсіптік кәсіпорын кіреді. Компанияның 2021 жылғы таза табысы 259 миллион фунт стерлингті құрады.
